【本報訊】「最浮誇嘅使錢方法梗係派錢啦，就係有豪客從大門一開，就一路行一路派錢；張張一千蚊紙，見人就派，連掃地阿嬸都有！」有「金牌大班」之稱的侯爵會媽咪Maggie細數當年：「嘩！旺到百花齊放，豪客喺夜總會門口等位，好似茶客喺酒家等位嘅情景。」那些年，小姐身穿幾千元一件的旗袍、皮草返工，「回歸前啲樓價咁高，媽咪呀小姐都有能力買；沙士後，海怡半島一個700幾呎單位都只係220萬，但都冇人敢買，冇生意邊個敢買呀？」
泊車仔收入高
以往夜總會好景，連帶門口的泊車仔都受惠。55歲的全哥80、90年代在尖沙嘴凱撒夜總會當代客泊車，「試過一晚代客泊超過100部靚車！」當年他月薪僅2,200元，「真係好好賺，有人畀200蚊貼士，嗰個年代，我月入可達萬幾蚊，而當年沙田偉華中心一個單位都不過30幾萬」。
2003年2月一場沙士，香港經濟直插谷底，旅遊業大受打擊；同年7月，中央推出自由行挽救經濟，但夜總會生意仍大幅下滑，夜場推出各種優惠自救。大富豪邀請俄羅斯歌舞團表演，每位250元包一杯啤酒，限坐一小時；中國城也推出150元入場睇歐洲歌舞表演、人肉壽司派對等。當時在中國城做大班的Maggie亦出盡法寶：「肚兜、睡衣、飛機師（主題之夜）呀！」業界掙扎求存，但仍抵不住結業潮，Maggie慨嘆：「05年起有間大型夜總會開始執笠，跟住大富豪、新花都等開始執笠啦！」
有「金牌莊家」之稱的前立法會議員詹培忠笑言，當年喜萬年夜總會被譽為股票金融界飯堂，行家會在此交換消息和應酬，亦是傾生意的好地方，不過1997年後，社會風氣改變、廉政公署加強反貪宣傳，到夜總會傾生意已經過時。
外人常說到夜總會「跳舞」，金勞詹卻笑指其實是沉迷在銷金窩：「美其名應酬，但事實係追小姐。電燈着、鬼掹腳，不知不覺走去夜總會。」
黃金歲月一去不返，他認為中央當然希望香港繼續舞照跳，但本港經濟條件已不同，租金又貴，「仲點經營夜總會呀？印尼一間夜總會面積幾十萬呎，內地任何地方都有大型夜總會，香港已被淘汰！」
■記者林 熊
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk