特首梁振英連日喺網誌向專業議政梁繼昌口誅筆伐，出盡力狙擊想迫對方退出調查UGL嘅專責委員會。網誌嘅內容嚟嚟去去三幅被，討論嚟都無謂，但網誌嘅寫作技巧，卻令政界花生友議論紛紛。
政壇流傳呢種用列點式寫作嘅「文章」，係出自日薪一萬、自比白宮發言人嘅新聞統籌專員馮煒光，有人笑稱，IC係咪連寫一篇完整文章嘅功力都欠奉？
內容無限loop
𠵱家仲係學生哥、喺嶺大修讀文化研究嘅香港眾志羅冠聰睇完梁特嘅狙擊網誌都大吃一驚，唔係因為內容出色，而係行文實在失色，呼籲家長同學生，如果想學好中文，千祈咪睇梁特文章，皆因「質素非常垃圾」、「行文沙石好勁」，認為任何一個考DSE嘅學生寫實用文都好過佢。
八方睇睇梁振英前日嗰篇有8點內容嘅網誌，「兩年半多來」、「梁繼昌身為專業稅務顧問」等字句不斷重複，同時語焉不詳，竟然唔講（定隱瞞？）梁繼昌舉報梁振英乜東東喎，甚至寫寫吓突然出現口語，例如指梁繼昌指控CY「接受緊稅務局調查」；如果係學生交功課，分分鐘被要求重寫。第6至8點仲無限loop，如果大家想欣賞呢篇「傑作」全文，可以去 http://www.ceo.gov.hk/chi/blog/blog20170522.html 。
而除咗梁振英網誌，馮煒光亦喺佢嘅報章專欄繼續就UGL事件落力搞批鬥，噚日喺《都巿日報》以〈針拮到肉就會知痛〉為題撰文，跟足梁振英口吻，話梁繼昌喺UGL事件上自編自導自演政治炒作，話要煞住這股風氣，最佳方法係以其人之道還治其人之身，「這股歪風要遏止，就要把針拮到這些人的身上！DQ港獨議員，重判旺角暴亂分子，是好的開始」。
唔知市民聽完日薪1萬嘅馮煒光日日掛住寫文護主，會唔會對公帑就咁倒咗落鹹水海心痛呢？
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk