新民黨主席葉劉淑儀喺政圈出咗名擅長幫人起機，唔少跟過佢嘅人都飛黃騰達。由佢做聯席主席嘅海上絲綢之路協會，今年再度舉辦名為「張騫計劃」嘅大學生暑期實習項目，名額156個都唔夠分，事關佢哋收到成600份申請咁多，比舊年多咗兩成，可見葉劉魅力驚人。
大家唔使恨喇，張騫計劃經已截咗止，噚日仲做埋啟航儀式。呢次156個名額係由超過10間公司提供，實習地點大部份都係一帶一路沿線國家。雖然大部份嘅實習地點都係內地城市或者東南亞國家，但當中有一份工係可以去到風光如畫嘅希臘，相當唔錯喎。
葉劉同八方分享嗰陣就話，𠵱家啲年輕人比起佢讀書嘅年代真係好好多，有咁多實習機會，事關70年代佢去英國讀書時，有得做嘅工只係喺食肆做收銀賣咕嚕肉飯咋！
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk