一代武俠女星于素秋，今個月12日因肺炎，喺三藩市安詳離世，享年89歲，家屬喺美國時間5月22日下午5點至8點為佢設靈，23日中午12點出殯。于素秋嘅喪禮舉行地點，位於三藩市灣區柯瑪市（Colma）嘅活倫殯儀館陵園（Woodlawn），採用佛教形式進行。
靈堂佈置簡約
靈堂內佈置簡約，擺放一部大電視放映于素秋生前參演過嘅武打電影片段，好讓親友懷念一番。而成龍、元彪同洪金寶等演藝界七小福成員，亦有送上花牌向呢位昔日嘅「大師姐」致意。活倫殯儀負責人利小姐同《蘋果》講，于素秋嘅遺體會進行土葬，長眠喺老公麥炳榮嘅墓地旁邊，又話家屬心情已經平復咗唔少。
于素秋主演過嘅作品數以百計，當中與曹達華主演嘅《如來神掌》最經典，佢係香港第一代俠女，1966年同粵劇名伶麥炳榮結婚，其後移居到美國生活。 于素秋對上一次現身已經係2009年，當時佢專程由美國返港，出席「七小福」 成立嘅50周年晚會。