港姐出身嘅蔡思貝，可謂近年違反交通法例「最甘」嘅藝人之一，先係舊年3月，《蘋果》記者撞見蔡思貝跟男友麥秋成到筲箕灣攞電單車，麥秋成揸車離開時，當時仲係P牌仔嘅蔡思貝揸住自己架甲蟲車尾隨，更不顧安全，單手駕車，另一隻手伸出車外，以手機拍下男友駕車英姿，其座駕更「頭搖又尾擺」，相當牙煙。到舊年7月，蔡思貝揸住佢架甲蟲車由金鐘紅棉道駛去灣仔時，喺燈位突然轉右，攔腰撞向隔籬線直行嘅的士，事後蔡思貝聲稱自己唔識路而出事，而佢就話自己：「我都要加鐘學睇地圖。」
至於同屬大台嘅羅鈞滿喺舊年3月於微博貼圖並發聲明承認醉酒駕駛，並指自己：「我做了一件非常錯誤的事情，就是酒後駕駛。縱使今次沒有釀成意外，但作為藝人理應以身作則。可惜我做了非常錯誤的示範，難辭其咎……對不起。」結果羅鈞滿因醉駕被捕，加上曾多次違反交通條例，最後被判100小時社會服務令及停牌2年，並要上駕駛改進課程。
阮兆祥舊年10月經歷燒車慘事，而佢喺燒車前幾日，駕駛出事嗰部綠色平治跑車往大埔接女友時，喺運頭街遇上塞車，疑「等唔切」喺車龍中切雙白線，繼而逆線行車約60米，接載女友後即掉頭駛走，過程被其他駕車者拍下。事後阮兆祥接受電話訪問時直認不諱，但解釋當時並不知自己切雙白線逆線行駛，後來又改口話：「可能我行錯咗，下次唔會喇，下次會小心。」
同樣係舊年10月，揸住佢架保時捷現身擺花街附近，仲停泊喺原本係巴士站嘅位置，適逢當日係萬聖節，巴士站暫停使用。其間警方見有車泊喺巴士站，曾響警號提示有關車輛盡快駛走，但係喺一間飾品店內購物中嘅余文樂只係回頭望一眼，未有行動。最後警方抄牌，余文樂架車當然不能倖免，但佢買完嘢後，急急腳揸戰車離開，未有理會「攝」喺車頭嘅罰單。