想睇龍舟比賽，唔一定要去赤柱嘅。一年一度嘅香港國際龍舟邀請賽6月2至4號會喺中環海濱舉行，今年總共有破紀錄164支本地同埋海外隊伍參加，夾埋有成5,000名健兒，齊齊角逐27個項目。
除咗睇邊條龍最快到終點之外，今年大會都搞搞新意思，引入好受歡迎嘅龍舟障礙賽，畀班入圍正賽嘅隊伍輕鬆吓。一隊10個參加者坐住小龍，由300米遠嘅起點鬥快扒返岸邊，仲要按規定手槳並用，沿住浮標轉彎及繞過障礙，可能冇直線比賽咁激烈，但就娛樂性十足。
近排引起唔少人討論嘅美食車，活動期間將會首次合體，14架一字排開齊集中環海濱，賣特色美食之餘，部份車仲會加推傳統鹹肉糭應吓節。觀眾喺美食車單次消費滿60蚊，仲可以獲得優惠券一張，即場啤酒買一送一。
旅發局主席林建岳話，今年活動夾埋使咗2,000萬，預計可以吸引10萬人次參加，其中四分之一係旅客。噚日英國曼徹斯特有音樂會發生炸彈爆炸，岳少就話香港治安一直好好，唔擔心有恐襲，但亦會加強保安。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk