「餅女」Miki(楊愛瑾)之前就被爆同好姊妹Kary(吳雨霏)劃清界線，原因就要追溯番去Kary小產事件，當時有知情者就向《蘋果》爆料指，話Kary小產事件好少朋友知道，事件曝光後，Kary亦即時鎖定目標放料人物，而Kary回應事件時只話「緣來緣去」，默認姊妹情有變。
雖然姊妹情不再，但係就無損Miki嘅心情，佢就依然活躍於社交網Instagram，昨日呢位靚媽又喺ig度上載咗兩張囝囝可愛嘅新相，Miki仲留言話：「做咗媽咪之後終於明白點解成日都要post自己個BB啲相，因為你真心覺得真係好得意，而且仲要係張張都咁得意咁獨得！唔開心share吓都唔得」。有網民見到就話BB真係好得意，又話BB好似爸爸添！