唔少人知道內地流動通訊市場一哥中移動（941），雄霸龍頭地位多年，噚日有中電信（728）小股東就用魚翅同粥，比喻三大電訊商嘅市場地位。
呢位小股東問中電信管理層，中移動係咪仍然「食翅」，而中電信同聯通（762）就「食粥」呢？中電信董事長楊杰聽到，唯有重提陳年往事，指公司好不容易做起移動業務，自己都「滿肚子話要講」。
呢段往事要由2008年講起。楊杰指，中電信收購聯通嘅CDMA移動資產後，先至開展移動業務，市佔率由當時3.8%，升到目前16%，非常唔易㗎喇。
咁之前點解冇移動業務呢？原來因為國家政策，中電信分拆咗流動電話出去，白白錯咗流動通訊高速發展嘅黃金時期。
最後，佢好慨嘆咁話，一切都已經過去，目前三大電訊商嘅市佔比例失衡，相信短期內格局唔會有太大變化，不過中電信會繼續努力咁話。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk