香港地公共交通雖然發達，但係都有唔少人鍾意自己揸車周圍去，好似方便啲，私穩度又高啲，不過揸車嘅嘢，唔可以一時貪方便，交通法例都係要遵守嘅。
好似大台上位姐仔、現年29歲嘅港姐陳庭欣咁，日前下晝5點幾，佢獨自揸車現身泊喺數碼港商場外，相信係因為嗰度好多地方都唔可以隨街停車，陳庭欣疑一時貪方便，就咁將部車停咗喺巴士站盡頭。停喺巴士站已經唔係好啱，嗰度仲要係雙黃線，咁真係講唔通喎！
陳庭欣落車後，就有一架警車駛到，見到有架車違例泊低，梗係落車抄牌啦！張「牛肉乾」放低冇幾耐，後陳庭欣喺附近一幢大廈攞完啲嘢返去車旁時，發現被抄牌，佢係有少少扁嘴嘅，但都懶理，開車門放低手上物品喺車廂後座後，就行入商場一間連鎖式快餐店買外賣。
由於當時係放學時間，餐廳內好多學生同家長，所以陳庭欣排咗好耐隊，全程花咗大約15至20分鐘左右，不過見佢一直有玩住手機消磨時間，收發短訊時，不時瞇瞇嘴笑咁，冇乜唔耐煩。買完相信係兩個人份量嘅外賣，陳庭欣離開餐廳時，仲摸吓坐喺露天座位嘅食客隻愛犬個頭先行返去座駕度，再施施然咁拎走張「牛肉乾」，再駕車離去。
其實噚日陳庭欣下晝出席完大台慈善節目《萬眾同心公益金》記者會，所以打扮靚靚咁，見佢心情勁好，又唔知同佢有個有米大狀男友唐偉倫（Warren）有關，所以被抄牌罰$320都唔在意。話時話，佢手上嗰袋二人前嘅外賣，係邊個食㗎呢？