【本報訊】55歲的全哥80、90年代在尖沙咀彌敦道凱撒夜總會當代客泊車，見盡夜總會繁華鼎盛，80年代夜總會最興旺，「當時喺尖東，每度梗有一間(夜總會)，百花齊放，試過一晚代客泊超過一百部靚車。」「泊車仔」收入主要來自客人貼士，當年全哥月薪僅2200元，但客人貼士就有幾千蚊，「真係好厲害，好好賺，有人畀200蚊貼士，那個年代，我月入可達一萬多元，而當年沙田偉華中心一個單位也不過30多萬元，所以個個(泊車仔)也去買樓。」
惟全哥年少輕狂拿錢去賭去玩，結果花清光。多年光景，令他最難忘是某年聖誕節，凱撒夜總會入口處建有一個大型魚池，養有逾百條鯉魚，「小橋上擺滿聖誕花，有客人經過，就搣去花瓣掉入魚池，結果翌日，所有鯉魚死晒，翌年凱撒亦結業，非常邪門。」
好景不常，至1995年港府開始實施法例打擊酒後駕駛，令夜總會泊車業開始衰落，「新法例下，老闆去夜總會飲酒，唔再自己駕車，或者直接找司機接送，令代客泊車需求減少，冇晒生意。」加上97年金融風暴來臨，經濟下滑，「去(夜總會)一晚花費冇一萬都幾千，賺唔到就花唔起，結果夜總會生意一落千丈。」當年，東方舞廳率先倒閉，凱撒亦逃不過命運。
凱撒結業後，全哥轉至尖沙嘴一帶酒家當代客泊車，隔離便是中國城夜總會，但他說生意也不復當年，夜總會都是傾生意的地方，「冇生意，自然冇人嚟，點會繁榮？」對於夜總會日漸式微，他認為是時代轉變必經階段，「現在仍是馬照跑，舞也是照跳，只不過轉了型式，變了開房玩，不再有大堂，不再是以前嘅大場。」