草蜢成員蘇志威個人名下愛駒「駿王」，來了香港大半年，一直受到傷患困擾，始終未能出賽，更曾經重傷瀕臨退役邊緣，於是未跑已經拉倉，由沈集成轉投鄭俊偉馬房，慶幸自此健康漸有起色，並可於今晨(23日)首次在港試閘。
「駿王」由騎師杜利萊試沙田第一組1200米泥閘，沿途居前跟住放頭馬，末段捱入一席第二名，走勢不算差但亦非太好。蘇志威及劉小慧兩夫婦，今晨亦專程到場觀看愛駒第一次試閘，兩人在鄭俊偉陪同下，了解「駿王」的最新情況，蘇志威又拍片，錄低愛駒一舉一動，又和太太入馬房睇馬，近距離和「駿王」相處，明顯非常寵愛呢位「囝囝」。
蘇志威表示，他們對愛駒的健康進展深表滿意，馬兒喜歡離開馬格舒展腳步，第一次試閘如同小朋友可以出去跑跑，已感到很開心，至於幾時出賽仍未決定，最緊要馬匹健健康康。劉小慧就笑言一定會勤入馬房探望「駿王」，並指探馬比睇試閘更重要呢！
蘇志威以7位數字價錢，買入三班馬「駿王」，此匹4歲美國自購馬現評72分，蘇志威是經前馬王「精英大師」馬主施雅治幫手簽名，向馬會推薦他們夫婦入會。「駿王」來港前只贏過一場1100米膠沙地賽，亦於美國金門園馬場1700米膠沙地表列賽加州打吡跑第二。但來港後由於一對前蹄球節患有腳掌軟骨病，因此至今未能出賽。