早前講過恒隆地產（101）主席陳啟宗搵人為公司寫歷史書，睇嚟本書已經有初稿，最近佢哋透過內部刊物披露少少內容，主要講陳啟宗爸爸陳曾熙做人處世嘅方法。上一代嘅人，多數刻苦、認真，陳曾熙亦唔例外，佢生前有句口頭禪：「你畀我一把掃帚掃地，我都會掃得比別人乾淨。」
華華真係好鍾意佢呢句口頭禪，幽默生動，一句講出最基本嘅工作態度，須知道唔少人未做好小事，就一味想做大事，結果一事無成。我估曾老先生未必掃過幾多次地，但感受到佢對做人做事嘅要求。
出差慳家只坐經濟艙
陳曾熙係順德人，1948年由廣州來港，去永隆打工，得到永隆創辦人伍氏家族嘅信任，1960年成立恒隆，搵埋細佬陳曾燾由婆羅洲嚟香港一齊打江山。
佢除咗工作認真，亦十分慳家低調，出差永遠只坐經濟艙。佢細仔陳絜宗憶述，無論飛長途定短途，陳曾熙坐飛機只坐經濟艙，皆因佢認為「你坐Economy同坐First Class，都係同時到達目的地，只係落機早一分鐘」。所以話呢，有錢人之所以儲埋大把錢，除咗識搵錢，仲因為佢哋慳家！
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk