近日跟中環朋友食晏，話題離不開誰人有機會出任財爺，許多人帶有幸災樂禍的語氣，指七一都快到，奶媽遲遲未能敲定新班子，反而聽得最多，是傳聞邊位邊位可能做局長、司長，但轉頭邊位邊位已經"Thanks, but no thanks."狂請奶媽食檸檬。
市場似乎唔多like陳茂波繼續做財爺，早前傳出多位賓架獲邀做財爺，包括王冬勝、梁高美懿等等，「高人甲」不禁輕輕問一句:點解大家覺得banker可以做到財爺呢？又係喎，做財爺，首先要熟識政府內部運作，因各個政策部門都要搵財爺爭取資源，財爺要懂得擺平各方利益，從中斡旋。
當年梁錦松擔任行會成員多年，又推動教育改革，算有政治經驗，2001年加入政府當財爺也弄得焦頭爛額。馬時亨的政治與公關手腕高明，人脈又廣，他由商界跳入政府做局長，都因為不熟識政府運作，被下屬跣，而為仙股事件鞠躬道歉。由此可見，即使閣下在商界叻到曉飛，入到政府肯定是另一回事。
另一位熟識政府內部運作的「高人乙」更中point。他指，外人加入政府做局長、司長，最重要是有江湖地位，以教育為例，由幼稚園到大學均與教育局有關，如此多辦學團體及德高望重的校長，若然教育局局長唔夠秤，如何服眾，如何叫人聽佢支笛？同樣道理，金融界瓣數眾多，地產、銀行、保險、股票全部關事，誰自認有此江湖地位。
講到最基本的條件，香港作為國際金融中心，財爺的英文水平一定要高人一等，雖說香港回歸廿年，一班尊貴議員與官員已經把港式英語發揚光大，但大家試想像一下，財爺與美國儲聯局主席耶倫會面，一口港式英語，情何以堪！
高淑嫻
https://www.facebook.com/koc9nine
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk