由張繼聰、白只、萬梓良、吳家麗、王敏奕、顏卓靈主演，新導演盧煒麟執導，改編自本地作家余兒同名小說嘅《今晚打喪屍》，上年已經拍攝完成，劇情講述喪屍喺全港爆發，呢啲畫面同近日個個爭住搶，喺荃灣一個新樓盤開售，賣樓經紀瘋狂圍攻睇樓客，兼為爭飯碗大打出手嘅短片喺網絡瘋傳，情節好相似。
見獵物衝過去
喺戲中，張繼聰、白只同顏卓靈眼見一班人向佢哋瘋狂直衝，以為係大批喪屍殺到，但最後至發覺原來係一班賣樓嘅地產經紀，最後班經紀更加追到大廈嘅閘口，手上面仲拎住售樓書大嗌，背後原來已經有經紀暗中喪屍毒。
導演盧煒麟指劇情加入咗好多日常嘅觀察，佢笑話：「幾年前睇新聞見過嗰啲地產經紀賣樓時好誇張，就好似喪屍一樣見『獵物』就不顧一切衝過去，總之有人經過，佢哋都會蜂擁上前，所以我將仍然係人嘅地產經紀喪屍團加入電影情節，佢哋為求賣樓，跑起上嚟快過喪屍。」
撰文：馮仁昭