每逢六四前夕，支聯會副主席蔡耀昌老是常出現，提醒大家將平反薪火相傳，但查實呢位大學時代因為八九民運熱血沸騰嘅年輕人，高中時無乜政治意識，感性之男實則係數理人，會考3A包括數學，係中大首屆中六暫取生。
50歲人稱九哥嘅蔡耀昌有3個家姐一個細佬，父親喺佢7歲時過身，由媽媽獨力擔起頭家。小時住慈雲山公屋，佢話試過窮到去米舖賒米，亦不時同阿媽去當舖，有時會去鄰居處幫手穿膠花，「即做即磅（水），買個包，整個餸，都頂到一陣」。
聲援北京學生被警急call
九哥喺保良局第一張永慶中學畢業，佢話中學時代較文靜，中六參加義工訓練活動，試過喺葵青區做問卷調查，「黃昏時候喺地鐵站收到份報章《號外》，講中英聯合聲明草簽，嗰時都唔知份聲明係乜，對談判亦無概念」，當日正係1984年12月19日。
會考3A、2B、2C，好成績令佢1985年成為首屆「暫取生」，到中大主修數學、副修社會學。但佢細個嘅志願查實係想做社工，因為喺複雜嘅慈雲山，唔少人入咗黑社會，所以好想幫返呢班人。
1986年上莊做福利幹事，1987年做副會長，當年會長係蔡子強，之後搞過無數抗爭遊行，特別記得1989年5月17日組織遊行聲援北京學生，一朝早就被灣仔警區指揮官急call ，「佢唔想我哋遊行去軒尼詩道，話好多金舖好危險，車埋我同陶君行去禮頓道site visit……我哋梗係唔制，叫佢快啲車返我哋去維園準備集合㖭呀」。
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk