曼聯打唔通基沙文電話？不如打畀21歲小將夏路普（Josh Harrop）？為咗留力應付周三歐霸盃決賽對阿積士，曼聯喺周日英超煞科迎戰水晶宮一戰派出5位預備組或青年軍小將擔正，包括門將卡斯度彭利拿（Joel Castro Pereira）、左閘迪美米曹（Demi Mitchell）、中場杜安施比（Axel Tuanzebe）、麥湯文拿（Scott McTominay）同稍為推前擔任左邊翼鋒嘅夏洛普，結果夏洛普喺15分鐘接應保羅普巴直線妙傳，喺禁區擺脫水晶宮守將後右腳燙射遠柱入網，一隊處子戰就取得入球，仲大擺「打電話」慶祝動作，拍得住收購目標、馬德里體育會前鋒基沙文喎！
夏洛普喺2012年以16歲之齡加盟曼聯青年軍，之後逐漸上位，今季受到學院領隊畢特賞識，上周預備組英超更喺領隊摩連奴面前大演帽子戲法，最終獲得上陣機會。不過，據英國《每日郵報》透露，夏洛普今夏約滿隨時變自由身，原本備受多間英冠球會垂青，但曼聯亦已向佢開出新合約，而家升價十倍睇嚟要加碼留人啦。夏洛普賽後都坦言夢想成真：「我嘅家人、朋友全部都喺現場，好高興佢哋能夠同我分享呢個美妙時刻。我自8歲起就為咗呢一刻接受足球訓練，如今實在興奮莫名，無言以對。」