樓市成交活躍，不但地產代理生意額上升，也帶旺裝修公司多了工程做。近年人人為上車，細單位最熱賣，此類裝修工程比例越來越高，當中不少後生仔女買樓靠父幹，原來裝修費都靠父母畀。
每個父母經濟實力不同，即使能為仔女畀首期，不代表全部大富大貴，資金來源很可能是其大半生辛苦積落的儲蓄。買樓不外乎揀新盤，又或者二手樓，兩類都有父母買畀仔女住，不過，二手樓內櫳比較舊，有可能全屋要徹底翻新，更換所有水電喉管，裝修費較多。
從事室內設計的朋友就告之，有客人花大筆老本為兒子買屯門居屋單位後，裝修費想盡量慳，原本建議他貼外國進口牆紙，因為圖案別緻，紙質較好及耐用，但客人即時拍攝牆紙款式，轉個頭返大陸搵價錢只及三分一。客人自己搵料有絕對自由，除了上述買牆紙外，也有返大陸買磚及訂傢俬，甚至經淘寶網購，各施各法慳得1蚊得1蚊。
父母出首期再花錢裝修，希望仔女有樓又住得好，反映事事照顧周到的寵愛心態。莫非真的秉承中國人傳統思想，「養兒一百歲，長憂九十九」？現實是千禧年代，人始終要自立，求神拜佛仔女生生性性，肯承擔做工賺錢供樓，否則將來繼續接濟下去，不知點算好。
然而，無論家境如何，父母能否買樓給子女，養育多年的確勞心勞力，母親節剛過去，下月輪到父親節，子女應該盡孝道回饋父母，唔好吓吓伸手攞錢失感情。
記者：溫潤潔
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk