唔通陳茂波有未卜先知嘅特異功能，知道自己唔只接替辭職嘅曾俊華做短命財爺咁簡單，而係新一屆政府，財爺呢個位都非佢莫屬，所以雖然短短4個月替補財爺角色，都要花費200萬裝修南區壽山村道嘅財爺官邸？
梁家傑：令香港丟架
雖然陳茂波堅稱，官邸要接待不同訪客，暗示唔可以太破舊，又話裝修唔係為佢而設，邊個做財爺都啱用，但佢呢種使錢意識，卻令唔少政界對佢或掌管特區庫房大叫巧京京。
公民黨陳淑莊好不滿佢亂使錢，「咁短任期都裝修財爺官邸，一個唔係量入為出、唔係精打細算嘅人，如果將來香港庫房喺佢手，只會係個大花筒」。已經卸任議員嘅公民黨梁家傑更加激動，佢話陳茂波只喺689陰魂不散嘅載體，出席國際場合只會令中國同香港丟架。公民黨唱雙簧棒打，莫非想畀當頭棒喝中央，為財爺易角留一線生機？
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk