德甲上周六煞科，已經提早封王嘅拜仁慕尼黑，喺安聯主場以4:1大勝弗賴堡，都可以話完美謝幕，中場沙比阿朗素同後衞拿姆完成最後一戰，沙比仔仲交出助攻俾洛賓先開紀錄𠻹。不過，拜仁陣中最唔開心嘅可能係「羅拔仔」羅拔利雲度夫斯基，事關四個入球都冇佢份，眼白白睇住多蒙特射手奧巴美揚搶咗佢嘅神射手寶座。
羅拔仔失落神射手
拜仁賽前已經落實五連霸兼第27次封王，對弗賴堡之戰都可能算係捧盃派對，四分鐘已經先開紀錄，洛賓接應沙比傳送射成1:0，沙比仔告別戰交出助攻，都別具意義。換邊後拜仁繼續強攻，維達爾、列貝利、甘美治各建一功，4:1大勝有尼斯彼德臣破蛋嘅弗賴堡。咦，入球名單竟然少咗一個熟悉嘅名字：羅拔利雲度夫斯基！羅拔仔踢足90分鐘，但八次射門都入唔到一球，補時階段有頭槌攻門機會，不過就選擇助攻俾甘美治埋齋，羅拔仔唔貪功，結果全季入球維持30球，俾奧巴美揚搶咗個神射手。
肥安首試啤酒浴話凍
慕尼黑一向以啤酒見稱，冠軍教練就往往要接受啤酒浴呢個待遇，「肥安」安察洛堤今季首次執教拜仁，就同之前教練哥迪奧拿、希歷基斯等，享受到啤酒浴，肥安話：「我第一次試到啤酒浴，感覺比我想像中凍，不過咁都好，一樣好開心。」
拜仁大軍賽後就換晒傳統民族服裝到慕尼黑市政廳廣場，同球迷分享喜悅；焦點就落到一對退休球員身上，拿姆由出道已經青靚白淨，往往被傳「性向成疑」，今次連法國中場列貝利，都大力咀佢嘅面珠墩一大啖，唔知拿姆會唔會暗喜。33歲嘅拿姆就向球迷道別：「大家都知道我係慕尼黑人，呢度對我都別具意義，我感謝所有球迷一路以嚟嘅支持。」35歲嘅沙比阿朗素亦都告別球壇，呢位西班牙一代全能中場，幫過利物浦同皇馬贏過歐聯，亦助拜仁贏得德甲冠軍，佢就話星期一開始，要開始新生活，適應掛靴後嘅日子；對於會唔會好似前利物浦隊友謝拉特咁轉行做教練，沙比就話仲未有決定。
