曼聯親啲定阿積士親啲，對於雲高爾嚟講，當然係阿積士啦！英國《每日鏡報》話，呢位65歲荷蘭籍教練日前過料畀阿積士主帥保斯，教佢點樣喺歐霸盃擊敗曼聯。
報道話，喺過去周中嘅一個荷蘭教練周年宴會入面，雲高爾同保斯密密斟，好多偈傾，相信係同曼聯、摩連奴有關。雲高爾係曼聯前兩季嘅領隊，熟悉紅魔陣中大部分主力嘅踢法同優缺點，而且雲高爾同摩連奴亦師亦友，以前喺巴塞隆拿帶過摩佬搵食，所以講現今球壇邊個最熟曼聯同摩佬，真係非雲高爾莫屬！
雲高爾喺2014年夏天上任曼聯主帥，但喺2016年贏得英足盃後，就慘食無情雞，因為曼聯要佢讓路畀摩連奴上位。雲高爾可以話係阿積士嘅傳奇，佢喺1991至97年間擔任球會教練，喺95年贏得歐聯冠軍。不過，雲高爾其實仲出緊曼聯糧，因為佢原先同曼聯簽嘅約到今年6月30號先屆滿。