現年66歲「香港公主」李司棋同42歲女兒葉子青早年母女不和，斷交7年，其後修補關係，奇妙電視開台節目《帶阿媽去旅行》，特登邀請司棋姐母女出遊，去日本福岡玩，佢哋趁機盡訴心中情。
打底泳衣穿崩
去日本當然唔少得浸溫泉，前晚就播出司棋姐同子青浸溫泉畫面，出鏡當然係要用毛巾包實，點知喺節目中，子青身上嘅毛巾突然瀡咗落嚟，打底泳衣穿崩，司棋姐唔單止冇幫子青拉番高條毛巾，仲快狠準扯甩條巾，佢話：「你又唔係唔見得人，我就話重口味啫，你就算啦！」嚇到子青擘大個口。
另外，前晚由「天下第一關」鄭紹康主持嘅《天下第一friend》首播，嘉賓係徐濠縈，佢大爆曾同老公陳奕迅（Eason）分手，但好彩經雙方朋友游說，大讚Eason係好男仔，最後佢哋成功復合。鄭紹康前晚又邀請貝安琪、蔚雨芯、何國鉦、陳法拉前夫薛世恆同蔡一鳳等喺黃埔食飯兼睇首播。
知法拉有新歡
近日被指同袁偉豪撞樣嘅薛世恆，被指有意同法拉復合，薛世恆話：「我哋係朋友，知道佢有對象，我唔可以代表佢講嘢，只可以話有聯絡。」薛世恆澄清早前爆出嘅緋聞只係霧水情緣，咁父母仲有冇催婚？佢話：「好多年前已經催咗啦！」蔚雨芯自爆近半年有人追，佢話希望結束兩年單身生活。
撰文：馮仁昭
