現屆問責班子剩番個零月任期，但係被揶揄為「外遊局長」嘅教育局局長吳克儉未放棄，繼續懶理外界批評，堅持夕陽時期發揮佢嘅最後餘暉。
噚日佢又飛嘞，今次係訪問英國，佢回應係咪有需要卸任期仲外訪時挺起胸膛話呀，坊間都有意見指摘佢冇出席國際會議喎，講到此行係非去不可，諷刺嘅係，佢班機因玻璃有裂痕噚晚折返香港，延至凌晨換機再飛，似乎連個天都唔想吳得掂成日飛噃！
教育界立法會議員葉建源早前踢爆吳得掂，話佢去年原本應承3月出席由經濟合作暨發展組織（OECD）舉辦嘅德國國際教學專業會議，但最後冇現身。唔知係咪因為呢件事，令吳得掂外訪自信心返晒嚟？噚日啟程前喺機場回應有傳媒問及任期得番6星期，係咪有必要外訪時，直指有人話佢冇出席部份國際會議，批評佢冇為香港教育界爭取更多資源或者新嘅知識喎，所以留港處理工作同埋外訪呢兩方面，要取得一個平衡囉。
政圈：應該專心搞交接
佢仲重申，現屆政府進行緊多方面工作，而各項工作都有相關人士喺度做緊嘢，例如防止自殺委員會正努力執行去年底作出嘅建議，總之係絕對冇放軟手腳喎。結果呢番話令唔少政界中人眼火爆，話乜新舊政府唔係應該專心搞交接咩？難為啲公務員仲要陪佢周圍飛喎！
吳得掂今次係應邀出席由英國文化協會舉辦嘅全球國際教育論壇，並會發表主題演講，亦會到訪當地學校及與在英嘅學生同工商界會面，周四返港，其間由副局長楊潤雄署任局長。
李八方
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk