【爆相爆片】林師傑（木偶哥）和女友歐陽巧瑩（Tammy）愛得癡纏，早前Tammy更笑言要主動向男友求婚，日前讀者亨頭透過本報「爆相爆片」，分享木偶哥和女友拍拖到西貢買消夜，亨頭更爆料指於半個月前，曾在同一地點見過木偶哥，不過，他指上次木偶哥是孖「木偶妹」譚嘉儀鬼祟現身！
指木偶妹避忌
亨頭在電話講述見到木偶哥和女友的情況：「嗰晚大約12點半，喺西貢巴士總站對出嘅小食街，見到佢哋買腸粉、燒賣、泰國菜，仲同老闆娘好好傾。我見到係女仔畀錢，之後佢將銀包交畀木偶哥，男仔負責攞嘢，當時落緊雨，由木偶哥揸車走。」亨頭言之鑿鑿表示：「半個月前，我喺呢度見過木偶哥同譚嘉儀嚟買消夜，兩個都戴帽避避忌忌。」問到會否認錯人？亨頭說：「一定係譚嘉儀，不過上次太近，所以冇影到相。」
對於被指背正印密會譚嘉儀，木偶哥回覆傳媒否認出軌：「Tammy嚟㗎喎，我冇踏兩船呀。」剛巧Tammy在他的身邊，兩人形影不離，她即時為男友呼冤：「呢件事，我係絕對100%好信任佢！佢好乖㗎，日日都send晒自己嘅行蹤畀我，話畀我知佢做緊乜嘢。」
稱冇化妝難認
Tammy笑說：「平時喺西貢附近食消夜，我係唔會化妝，笠晒帽，所以佢（讀者）認為嗰個係第二個女仔，可能我第二日出街，盡可能趷高啲個頭，俾人見到呢個係我嚟嘅，或者化啲妝，再唔係就打塊金牌掛喺心口，寫住『我係歐陽巧瑩』咁囉，哈哈！」
採訪：皓騫
