林鄭當選就嚟兩個月，唔少內地中間人都探問香港政界林鄭表現如何，發現黨派中人普遍畀正面評價，至少覺得佢肯溝通，唔似梁振英咁好勇鬥狠。而林鄭另一樣同CY不同之處，就係冇咁一路向西，有呢排見過林鄭嘅政界中人話，林鄭反覆重申任內唔使中聯辦幫拖；至於做唔做到，當然要拭目以待。
有政界中人引述林鄭指，唔使西環幫拖之餘，亦希望西環日後多啲搞「擅長」兼啱佢哋角色嘅工作，例如協助喺內地居住、讀書等嘅港人啦，又或者當香港有代表團到內地訪問時，適當地提供協助啦，呢啲職責同功能，總括嚟講有個共通點，就係……喺內地幫忙就夠嘞，香港金鐘添馬呢一帶，都係由林鄭自己嚟搞啦，明顯唔想西環插手港務，希望佢哋專注內務，即係內地事務！
雖則政界中人都好想林鄭呢個心願能償，但隨住中央對港政策揸得緊咗，相信西環呢個代辦嘅駐港機構一定會加強執行任務，唔多相信西環會對添馬嘅事務撒手不管。佢哋反勸告林鄭一句：希望越大、失望越大。
而喺林鄭登基倒數一個月，北京中間人已經空群來港，除咗為即將7.1到訪嘅主席習近平視察探路，順道了解林鄭最新形勢，有獲邀見面嘅政界中人透露，北京使者話明會因應新特首上場，調整對港政策處理手法，都有可能喺細微事務上因應林鄭意向。
花生友