【本報訊】「港英年代，你伸隻手出去會掂到彭定康，97後董建華一上場，已喺東西翼建大閘」。90年代初已是示威常客，「阿牛」曾健成見證三個年代的政府總部對待示威者態度的變化。「𠵱家嘅所謂門常開，又安檢又大閘，示威區鬼咁遠，要見啲高官個影都難」。儼如鳥籠的佈局，當年已叫示威者無奈，他苦笑謂哪想到走過三任特首，情況越來越壞：「公民廣場長期關閉，根本係門常關，作為國際城市，呢樣肯定係大倒退。」
阿牛懷念肥彭聽民意
前政總位近終審法院，是示威勝地，阿牛謂，記得斜路上有棵大樹，很多白鸚鵡棲息。「華人領袖嘅特色就係要起閘，有次7.1遊行，大批人塞咗喺附近，望住啲鸚鵡忽發奇想，訓練到佢哋叫口號就好，唔使連廁所都冇得去咁辛苦」。身處「鳥籠」插翼難飛，令每年參與保釣的他份外懷念港英：「除咗政府總部冇咁多閘，我最記得肥彭有次去小西灣巡區，截住佢要求坐低傾，10分鐘後已獲安排喺房屋署辦事處見面。」
儘管被指政治騷，但小市民感覺被尊重，仍然難能可貴；反觀回歸後三任特首，他稱就連請願信都難遞，更遑論會面聽訴求。「中國領導人從群眾而嚟，但其實最怕群眾」。
習近平訪港，表示仍會繼續示威的他就下了戰書：「有冇道德勇氣企喺真正群眾面前？唔係搖旗仔嗌歡迎嗰種，係真正群眾。」回歸20年，由政總到門常開，一道道有形無形的閘，摸不到也一定感受到，「肯定係大倒退。」阿牛說。
■記者呂麗嬋
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk