本地騎師做咗這天（21日）沙田日賽下半場主角，第七場潘明輝「仁愛之星」及第九場巫顯東「快樂寶貝」勝出後，兩人師兄楊明綸於最尾第十場二班1600米，爆大冷贏李易達馬房「勝利導航」，單Win及組合獨贏A3分別421及21.5元，練馬師李易達拎到季內個人第16場頭馬，宣告達標上岸。
楊明綸同巫顯東一樣，本周三（24日）谷戰起均要停賽兩期。結果兩師兄弟今日尾段先後發力贏馬，包辦全日最後一口孖寶。當中楊明綸個人累積連勝三次賽事，在港頭馬衝到201場，巫顯東則以32分勝出今次騎師王。
講番李易達，今日之前原來季內他一直只識贏四、五班賽，今日「勝利導航」幫佢取得今季首場三班或以上頭馬。呢匹四歲澳洲自購馬，馬主是新鴻基地產副董事總經理雷霆。
此駒在港之前八戰兩亞，今次跑二班負輕磅，沿途殿後居尾二，只衝最後一條直路，末段從大外叠逢馬過馬，就連最先突圍的大熱門「喜旺寶」都頂佢唔住，取勝姿態非常誇張，「勝利導航」小勝0.75馬位，但樓神雷霆並冇到場，只由他人代拉頭馬。
「喜旺寶」力拼失手做二奶，三、四名由「再開心」及「上利多」順序跑獲，四重彩派15萬幾。