台北市長柯文哲3月底到訪馬來西亞時，原定同吉隆坡市長阿敏諾丁會面，點知阿敏諾丁臨時取消咗會面行程，令柯P好無癮。
事隔個零月，輪到香港青年聯會戰戰兢兢，皆因佢哋早前有個馬來西亞訪問團，主要係傾一帶一路，期間約咗阿敏諾丁市長會面。帶團嘅香港青聯主席吳傑莊話有柯P被放飛機事件在前，一行25人都好擔心會食檸檬，最後順利同市長會面，仲讚對方好nice㖭，引述市長最關注點樣推動當地旅遊業，表明想吸引多啲港人去當地旅遊。
暫時未知市長喺吸客方面會點樣搞搞新意思，但好肯定係市長好關注香港嘅智慧城市發展，都就呢方面問咗唔少問題㗎。此行團員仲同時與馬來西亞旅遊及文化部長座談，並參與當地大型企業兼與青年企業家聚會，相互交流一番。