嗰頭講緊潘頓第一、第四場均俾雷神食住做二奶，呢頭潘頓就喺第五場三班1400米作出反擊，策葉楚航馬房「中華之光」為馬兒開齋兼奪十八區盃，單Win及組合獨贏A1分別派65.5及13元。潘頓個人在港累積第700場頭馬；而雷神大熱門「帝豪寶寶」只得季軍。
潘頓昨日（20日）在澳門中三元，成為首位本港騎師囊括同屆澳港盃及澳門打吡，出盡風頭。返到香港後，今日（21日）第五場佢策69分3歲澳洲未閹雄馬「中華之光」亦交足功課，沿途留放恰到好處守第五位，直路於外叠以勁勢超越所有內側對手，小勝0.5馬位，「中華之光」插三班暫時在港四戰得一冠一季。
練馬師葉楚航昨晚在電視台籌款節目開金口唱歌，籌得一筆善款捐助社會，今日即捧盃贏「中華之光」，可謂十分應景。葉楚航說：「『中華之光』今場排3檔形勢有利，牠是未閹雄馬，我打算安排牠在暑假接受閹割手術，希望下季成熟後有更進步表現。潘頓上場跑完此馬，建議我為牠加眼罩，今仗用眼罩上陣效果正面，牠會主攻沙田1400米。」
第五場二至四名順序為「君悅灣」、「帝豪寶寶」及「開心遊戲」，四重彩派9,405元。亞軍「君悅灣」造就42歲最年長現役華將賴維銘今季首度入三甲，兼與頭馬「中華之光」開出82倍啡燈Q，令落飛黨獲利約1,300萬元。
至於雷神之「帝豪寶寶」出閘稍慢執輸行頭慘過敗家，結果1.6倍頂頭大熱只得第三，此駒用雷神合作到第三次依然跑P贏唔到。