左丁山孤陋寡聞，不識日本有一間「丸龜」，更不識香港有一間「譚仔」，看報知道前者可能出價收購後者，代價傳聞係十億元，都幾多錢噃，於是問記者小G：「你係日本通，知唔知呢兩間食店呀？」小G大笑：「你真係堅離地，譚仔雲南米線你都未試過呀？去咁多陸羽、上海總會，試吓啲本地連鎖店啦，好心你。」試也無妨啫，在中環邊條街？小G即刻上網一查，回答話：「對唔住，中環冇譚仔雲南米線，唔怪得你唔識。」雲南米線都食過嘅，口味好似淡一啲，要加醬油加辣，又唔啱左丁山脾胃，所以一直冇留意有啲乜嘢「米線名店」。原來日本人睇中咗「譚仔」，咁就祝佢地合併好運，不同文化嘅食店合併之後，雖則可以分開獨立經營，但日本人與中國人之飲食文化始終有鴻溝分隔，未必可以最後成功嘅。
想當年，左丁山所屬嘅投資基金夥拍泰國企業（擁有Pizza Hut泰國經營權）到北京搵合作對象，開設北京必勝客，得高人介紹，以為可以開得順利，點知談判需時，拖延近兩年，等到六四之前先至簽約拍板！一簽就發生六四，卒之又拖延注資，去到92年初先至正式開業，左丁山早已轉行做傳媒了。在籌備期間，必勝客要依足營運指引，一板一眼，不能乖離，點知請到嘅廚房人員一時話Pizza（當時北京合夥人要求叫做必薄餅）唔啱北京人口味，一時又話加少少中國元素會更好食，於是搞到總經理（由台灣請來，曾任台灣Pizza Hut高層）大怒，聲言要炒晒班人，另請一班完全未識廚房為何物嘅年青人開工。開業後嘅運作究竟如何，因左丁山已離開，唔知道咯。開連鎖食店為求口味統一，材料統一，監控財政統一，斷不容許啲廚師、店長發揮創意，不依照中央制訂嘅manual辦事，譚仔係家族生意，將來賣咗俾丸龜之後，變成企業一部份，能否融合順利，頗具挑戰性。
小G嘅同事C仔唔抵得左丁山未食過譚仔雲南米線，話要在黃埔花園買碗外賣俾左丁山試吓，小G立即提醒佢：「黃埔間譚仔，係譚仔三哥，唔同㗎！」真混淆，問個究竟，原來又係家族分家嘅後果，幸好未弄成爭產啫，香港不少成功嘅大家族企業每每難以避爭產一事，最新例子係鷹君家族，鷹君羅氏六位公子位位叻仔，醒目過人，竟然都唔可以內部和平協商解決分歧，而搞到家書公開，真令人感慨也。