「超人」李嘉誠嘅紅顏知己周凱旋將維港投資（Horizons Ventures）打理得頭頭是道，經常為超人搜羅唔少新玩具，好似冇蛋嘅炒蛋、冇葡萄嘅葡萄酒、人造漢堡扒、抗衰老藥、AI、VR等等。到底呢一間做咁多奇怪投資嘅公司，間office係點樣？華華上星期就有機會去揭開呢個神秘面紗！
掛咗兩幅Bob Dylan畫作
原本以為咁high-tech嘅投資公司，一定會好似facebook、google嘅寫字樓咁，地方大、玩意多，查實維港投資只係租用灣仔商廈一個普通寫字樓。
不過裏面裝修有別於普通寫字樓，比較有格調，感覺homely，員工工作空間夠大，會議室亦有特色，其中兩間會議室分別掛上諾貝爾文學獎得主Bob Dylan嘅畫，分別係"Woman in red lion pub"與"Man on a bridge"。聽講兩幅畫係周凱旋嘅心水，Bob Dylan未攞獎已經買入。
另外，有員工喺房掛上超人其中一件最愛玩具，就係摺得埋嘅燈膽。燈膽由LED燈公司Nanoleaf製造，超人2014年試過喺記者面前將一塊奇形怪狀嘅電路板摺成一個燈膽。呢個摺得埋燈膽比傳統燈膽慳八成八用電量，仲可以用App設定唔同顏色，好有藝術feel喎。
李華華
mailto:[email protected]
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk