德甲周六曲終人散，嗰邊拜仁慕尼黑對弗賴堡送別兩位老將場面感人，另一邊嘅護級雙「堡」戰就鬥得激烈，任何一隊輸就要踢升降班附加賽，點知有德甲「小強」之稱嘅漢堡，真係踩極唔死，保持從未降班的金漆招牌。
呢場對禾夫斯堡許勝不許和嘅佢哋，竟由啱啱一日前過完21歲生日嘅壽星仔禾特舒密特，喺完場前兩分鐘頂入2:1嘅致勝球，賽後升上第14位，唔使四年內三踢附加賽定生死，球迷賽後興奮到發晒癲咁，拆咗成個龍門，連角球旗都唔放過，全部搬上火車帶返屋企留念，認真奇景！至於跌落尾三嘅狼堡，前季仲踢緊歐聯，𠵱家就要等埋德乙第三嘅對手，喺月尾踢兩回合附加賽先知有冇得留低。
蜜蜂「雙贏」直入歐聯分組賽
至於多蒙特主場對雲達不來梅，都唔係冇嘢爭，務求要高分過賀芬咸確定第三，下季直入歐聯分組賽，結果兩隊合演場4:3嘅大比數，開出[主其他]波膽，而最開心係入兩球嘅奧巴美揚，賽後累積31球，壓過羅拔利雲度夫斯基搶走德甲金靴。