有留意高明動向嘅讀者應該記得，舊年高明去咗美國巴郡股東會，高明同時係以股東同記者身份出席。現場出席可以睇到世界第一級投資者嘅處事手法，更重要係，以股東身份出席股東會，就連畢菲特都要以合夥人嘅身份回答你嘅問題，你可以從管理層嘅言語同神態拎到真正嘅貼士。
本月12號星期五，彩星玩具（869）發盈警，高明身為負責任嘅股評人，上周四去咗佢哋股東會。
發盈警後，公司股價大插至最低1.15元，但隨後幾日收復返去盈警前嘅水平，反映市場對盈警嘅睇法。上周，公司亦喺不同價位回購，有人在股東會問管理層點解出完盈警後回購。管理層直接話當股價同公司管理層覺得應有價值出現大偏差，就會回購。即係話，上周一隻股見咗今年低位，並且冇機會再見。
跟住高明問佢，首季純利大跌至只賺400萬元，如果情況持續，手頭上10億元現金可唔可以維持現有派息。管理層話會維持穩定派息，舉例話舊年賺每股0.09元，都派0.1元股息，仲話即使公司有10億元，都唔會亂咁併購。公司每年派1.2億元股息，最壞情況完全冇純利，都可以派超過8年息，比起特區政府保留至少18個月儲備更穩健；現時股息率仲係7.7厘，已經係一隻超強嘅收息股。
彩星玩具近乎冇負債，10億元現金，2,835萬元投資及物業，連埋殼價6.5億元，每股至少應值1.39元。更重要原因：聯交所上周五收市後顯示，股東會後新任主席杜樹聲同執董鄭炳堅一同增持。其中杜喺星期一以1.21元買入12.9萬股。資料顯示，佢過去多次以行使股權增持彩星玩具，喺2013年持股權達1.5%，2014年高位3.6元不斷減持，至持股權最低0.81%。發盈警後，反而用真金白銀增持。我即刻諗：（一）佢都肯買，肯定有料到。（二）之前行使股權後去到3.6元先肯賣，𠵱家升一倍升到2.6元，佢都唔沽啦！公司回購一路由1.18元買到1.28元，上周五收市只係比「重大偏差價」爭兩格，股底超強。
高明
http://www.fb.com/bigricetea
本欄逢周一刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁： http://hksar20.appledaily.com.hk