陳錦鴻近日幫無綫宣傳即將播出嘅10年倉底舊劇《蘭花劫》，因為錦鴻同港視嘅合約至明年2月就屆滿，佢喺活動放晒聲氣話擔心之後會失業。
但其實使乜驚吖，無綫一早就打錦鴻主意，好想佢回巢返去拍《創世紀》第三輯《再創世紀》。近年大台力捧洪永城、蕭正楠、黃子恒，甚至「小鮮肉」何廣沛等上位做一線，可惜劇集口碑同收視都麻麻地。相反，一班離巢舊將全部變晒福將，《全職沒女》嘅張兆輝、《不懂撒嬌的女人》嘅林文龍，甚至早前《乘勝狙擊》演第四男主角嘅吳岱融都係憑「蔣天龍」一角力壓陳展鵬搶晒鏡。
當年陳錦鴻喺《創世紀》中飾演「許文彪」，亦正亦邪演技被受讚許，雖然佢最後跌落山崖死咗，但《再創世紀》其實都有預佢一份。錦鴻前日接受《蘋果》電話訪問時直認無綫有人接觸過佢，佢話﹕「其實未公佈前已經問我，連撈家(羅嘉良)、古仔(古天樂)都搵，冇理由唔搵我㗎？但我就話合同問題，除非2018年拍會考慮，我同港視仲有約，港視冇所謂，但我個人係唔想令件事好似好複雜，攞緊人哋人工，又幫人拍劇，你話做少少宣傳(《蘭花劫》)梗係冇問題，我都冇收錢。」
據了解，愛奇藝當初同無綫合作拍《再創世紀》時，都係想搵番原班人馬，可惜「葉榮添」羅嘉良、吳奇隆同蔡少芬喺內地好搵到食，要度佢地嘅期都唔容易，而古天樂就已經貴為影壇紅星，近年仲做埋電影出品人，要請得動佢返大台拍劇，睇怕都好難。《再創世紀》嘅骨幹人物近乎人面全非，o依家剩係得番馬志強(郭晉安飾)同新加入嘅周麗淇落實演出，問覺唔覺係「掛名」《創世紀》？錦鴻話﹕「唔緊要，最緊要拍得好添呀，如果佢哋好成功攞埋全國收視冠軍，我哋又可以再重播嘛。」不過，好似話愛奇藝老闆會親自出面請古仔、撈家呢班紅星嚟客串下，睇下到時有冇轉機啦！