馬圈有班專賭大錢之人，俗稱落飛黨，佢哋經常眼光獨到有佳作，好似今日（21日）沙田第三場四班草地1200米咁，落飛黨命中大摩馬房、巫顯東策騎的「銀城福星」4.8倍綠燈Win，組合獨贏A2派24元。而且更中埋搭亞軍「幸福加數」的21倍啡燈Q。
23歲見習騎師巫顯東早前犯規，將由本周三（24日）開始停賽兩期，今場佢贏大摩馬房「銀城福星」補償損失，此駒藉106輕磅之利，一放到底贏1.25馬位，馬兒季內第二次贏馬，亦成為67歲的大摩與23歲的巫顯東，呢對年紀相差44年的練騎之首匹合作頭馬。
今場落飛黨向一對華人騎師座騎重注出擊，結果開出巫顯東4.8倍綠燈Win「銀城福星」外，梁家俊的「幸福加數」沿途前置跑第二，開出21倍啡燈Q，令到落飛黨在此場W、Q彩池，純利有1,800萬元，贏到盆滿缽滿。
今場巫顯東、梁家俊一對華將包Q，而三、四名則由一對洋將座騎「春盈」（田泰安）及「香江新星」（潘頓）順序瓜分，四重彩派一萬五千幾。