現年68歲歌神許冠傑（Sam）和66歲譚詠麟（阿倫）兩位樂壇長青樹，將首次攜手合作於8月12日至18日在紅館舉行一連七場「阿Sam & 阿Tam Happy Together演唱會」。昨日兩人在中環四季酒店為演唱會舉行記者會，一出場即jam歌唱medley。
做到集體回憶
現場司儀問何以促成今次演唱會時，Sam說：「舊年我演唱會時阿倫做過我嘉賓，大約兩個星期前收到消息話一齊開騷，我梗係𧄌飯應啦，我好鍾意阿倫《霧之戀》同埋《愛的根源》。」
阿倫表示曾邀阿Sam為自己作曲，但至今仍未收到新歌，他謂：「阿Sam唱《鐵塔凌雲》已經成為咗廣東歌流行經典，廣東歌曾經喺世界上舉足輕重，不過𠵱家就要睇吓邊個唱，我哋希望到時可以做到集體回憶。」 Sam透露屆時會跟阿倫互唱對方歌曲，又會邀請不同樂隊包括花花公子、溫拿、Lotus等合奏，Sam隨即高叫：「廣東歌永遠不死！」
唱rock版粵曲
之後阿倫與阿Sam接受訪問，由於阿Sam過往開騷經常與男女fans錫錫，問阿倫屆時會否與阿Sam一起落台送吻？阿倫抵死地說：「過往演唱會Sam都錫好多，今次一人一半，男嘅就佢錫，女嘅粗重嘢就留番畀我。」對此阿Sam笑言沒所謂，大家最緊要開心。阿倫揚言不擔心忘記歌詞，阿Sam就表示正考慮唱rock版粵曲《帝女花》和《禪院鐘聲》，又提議唱假音了得的阿倫反串做花旦。Sam表示屆時會穿喜歡的豹紋衫，阿倫笑說：「佢着豹皮，我着老虎，到時咪虎豹別墅，我係溫拿五虎嘛。」一向為食的阿倫，已想好帶阿Sam到處搵食，揚言自己不會減肥戒口。
採訪：卓寶花
攝影：仇志德