曼聯禮拜日會喺英超煞科主場鬥水晶宮，領隊摩連奴喺賽前記者會透露，之前因為爸爸過身無踢兩場嘅中場保羅普巴將會復出，估計係為咗谷起佢嘅狀態應付下個星期鬥阿積士嘅歐霸盃決賽。
由於曼聯今季肯定會以第6名完成聯賽，呢場英超煞科對紅魔鬼嚟講真係完全無意思，摩佬亦講過會派一班後生仔上陣，明顯係費事呢場波整傷幾件影響歐霸盃決賽排陣。摩佬話：「普巴要踢禮拜日場波，係因為佢已經有一排無練波。基斯史摩寧有傷但下個禮拜應該無問題，費蘭尼嘅情況就視乎掃瞄嘅結果，另外科素文沙呢場都會踢，如果佢反應ok，踢完成場都無乜問題嘅話，咁歐霸盃決賽都有可能上陣。」