香港唔少頒獎禮，如果候選人no show，可以話係冇獎攞嘅預兆，勢估唔到呢個潛規則遠到英國都適用；曼聯周四舉行球會年度頒獎禮，早前因膝傷收「咧」嘅前鋒伊巴謙莫域（小圖）據報返咗瑞典養傷，結果全晚「食白果」，兩個年度最佳大獎分別落喺中場安達靴里拉同右閘路爾斯華倫西亞身上。
靴里拉膺紅魔年度最佳
曼聯嚟緊仲有兩場波要應付，包括周日聯賽煞科戰主場對水晶宮，同埋下周三歐霸盃決賽鬥阿積士，球會趁呢個空檔先嚟沖喜一下，場面亦星光熠熠，近期奔喪嘅保羅普巴趕及出席，當然唔少得領隊摩連奴，同埋迪基亞、基斯史摩寧等攜同靚靚女伴亮相。曼聯呢晚頒發五個獎項，其中球員先生落喺路爾斯華倫西亞身上，而由球迷選出嘅年度最佳球員「畢樹比爵士」獎，就由27歲全能中場安達靴里拉奪得，成功打破同胞迪基亞喺呢個獎項三連霸。
其餘三個獎項，阿美尼亞中場米希達利恩憑舊年「拆禮物日」射入嘅「蠍子腳入球」榮獲年度最佳入球，近期獲得一隊機會嘅19歲小將杜安施比（Axel Tuanzebe）成為年度最佳預備組球員，拿尼嘅16歲表弟安祖高美斯（Angel Gomes）就榮獲年度最佳年輕球員。