聽到白德民個名，可能老一輩馬迷先對佢有印象。呢位51歲前騎師近日於澳洲馬壇就再一次浮上水面，甚至已經捲起一股白德民旋風。
事關白德民最近榮任練馬師，接替奧詩成為中東油王高多芬集團澳洲分部練馬師。其實佢做呢個職位之前，都有做過吓馬房副練，絕對唔係空槍上陣。
雖然高多芬集團表示過，白德民可能只係過渡性質，遲啲可能搵名氣更大練馬師真正接替奧詩，但白德民上任唔夠一星期，就已經成功開齋。
如果稍後唔覺意贏埋大賽，屆時正式搵佢簽肥約，有咁大條油王水喉射住，白德民想變番以前瘦到成個湯告魯斯咁嘅樣，睇怕都幾難。
講起白德民，其從騎生涯可謂充滿傳奇。93年在港被馬會指控向座騎「多多彩」造假，事件轟動一時，結果佢被判停牌九個月。
31歲那年，佢突然轉做牧師，所以有「白神父」之稱，惟三年後又重操故業騎馬出賽。
白德民贏過七屆悉尼冠軍騎師寶座，06年仲入選埋澳洲賽馬名人堂。去年12年，佢喺香港試閘時，因墮馬撞親個頭搞到平衡力、說話能力及記憶力都大受影響，直接返澳洲養傷半年後宣告永久掛靴。
如今白德民幫大馬主高多芬集團練馬，睇嚟呢位白神父傳奇之路，會一直咁延續落去。