由政制及內地事務局局長政治助理升呢做副局長後，35歲嘅陳岳鵬毫不留戀熱廚房，仲要剩得嗰一個月任期都要跳船走人，乜個廚房真係咁難頂？咁又唔係必然。好似現年41歲嘅民建聯徐英偉（Caspar）咁吖，2008年開始出任民政事務局政治助理至今，八方聽聞，佢有機會來屆「升呢」做副局長，由於現任民政事務局局長劉江華料留任原位唔調至政制及內地事務局，換言之新一屆嘅民政局，或會畀民建聯獨霸。
Caspar：冇人搵我
有政界中人同八方講，Caspar7.1後要負責嘅工作，繼續排到密麻麻，相信佢會留任現局並升呢。八方問過Caspar，係咪政途更上一層樓，佢只回應話，未有人搵過佢喎，之不過呢，太太已經落咗「警告」，警告佢唔好諗住留喺屋企湊仔喎，呢一句，可圈可點喎！
據知現任民政事務局副局長許曉暉，留任機會唔大，而呢個局向來係揸住政府條大水喉，負責各區資源「分餅仔」重任，各式選舉亦關佢事，加上公民教育係喺旗下，影響力舉足輕重，中央向來要求由「紅底」高度可信人士揸莊，董建華年代嘅何志平，再到曾蔭權時候嘅曾德成，都係根正苗紅；而梁振英兩年前突然炒咗曾德成魷，繼而由原政制及內地事務局副局長劉江華頂上，可見劉江華喺阿爺心目中係自己人。
雖然之前有傳劉江華7.1後會調至政制及內地事務局局長，但最新消息係佢應留任民政局，極有機會與同樣係民記出身嘅Caspar拍住上，現任副局許曉暉則會離任。如果成真，民建聯就獨霸民政局，變成「民記局」咯！
李八方