狼英交叉死鼎，狀似疑犯開庭前偷偷跟檢控官摸底夾口供，點會唔出事。
曾經被西環擺佈，「被讓路」將議席雙手奉上的亡國興浩歎：「隻死鼎令我記起二十年前那隻回歸寶鼎，運來香港一落地就跌斷腳，變成跛鼎，點頂呢。唉，我真係頂佢唔順，叫隻鼎引咎辭職啦，等我同基哥隻揪爭佢個空缺！」（注意，基哥落選區選會，無資格參加超級區議會補選，興叔贏面極高，開定午餐肉罐頭，熱烈地彈琴，踢跛鼎下台！）
死鼎身邊豬一般的黨友點補鑊？英文搓胸那位try his best兜住，但口窒窒擺明唔想惹屎上身。只有大喝「執番那些（BCA試題）垃圾至好走！」的黨高層，大聲反駁：「摸底，唔係強姦喎！修訂文本，又唔係考試出貓，使乜告到去ICAC！」另一個一直自稱博士忽然參選時自動降班做番碩士的黨友附和：「如果有蠱惑，斷斷唔會全篇一字不漏，照交功課咁啦，心有鬼的話，求其改兩粒字，神不知鬼不覺。」最後，連C姐都忍唔住開罵：「如果特首無修訂文本表達權，不如炸咗特首辦！」真炸嗎？撐！like到上佢鼻！