周三NBA東岸決賽，休息咗九日嘅騎士喺球星勒邦占士（LeBron James）嘅帶領下，作客以117:104擊敗塞爾特人，場數領先1:0。
塞爾特人嘅防守喺占士面前真係形同虛設，呢位32歲騎士球星轟入全場最高嘅38分，加上不斷殺入禁區搶分，全場16次喺禁區起手只射失三球。值得留意嘅係，占士嘅季後賽生涯已累積射入5,885分，距離榜首嘅「波神」米高佐敦（Michael Jordan）亦只差102分，占士亦極有機會喺今季季後賽打破呢項紀錄！
占士轟38分騎士拔頭籌
另外，可能仇人見面份外眼紅，今季季後賽頭兩圈平均得13.8分嘅路夫（Kevin Love），重遇2015年季後賽將自己整到甩骱嘅奧利尼克（Kelly Olynyk）即刻大爆發，貢獻出「雙雙」32分12籃板；至於中鋒T湯臣（Tristan Thompson）亦射入20分。
雖然塞爾特人主將I湯馬士（Isaiah Thomas）今場交出「雙雙」17分10助攻，呢位只得五呎九吋嘅控衞喺第四節尚餘9分47秒時更企圖飛身阻止六呎八吋嘅占士入樽，仍難阻球隊以13分之差輸波；假如塞爾特人想喺周五舉行嘅Game 2贏波，都要諗吓辦法改善啲防守喇。（樂視明日8:30am直播）