候任特首林鄭月娥呢排忙組班，但點忙都好，佢都抽時間出席慈善活動。林鄭早前去咗香港乳癌基金會籌款慈善晚宴，今次仲同埋甚少去公開活動嘅丈夫林兆波一齊出席，可謂相當畀面，林鄭席間仲爆咗老公一個小秘密。
今次慈善晚宴係由匯豐銀行副主席王冬勝太太王吳金薇搞，個名叫「Wings of Hope」，主要為香港乳癌基金會係為興建中九龍服務中心籌款，當晚活動雖然係私人性質，但陣容鼎盛，有逾400名政經名人捧場。
林鄭讚老公數口精
作為丈夫嘅王冬勝固然捧場、仲有特首夫人梁唐青儀、乳癌基金會名譽會長范徐麗泰、基金會主席霍何綺華同丈夫霍建寧，連早排傳做教育局局長、由日本返香港嘅乳癌基金會大使陳美齡都有到。
林鄭致辭時就爆料，話老公係唸數學出身，所以數口一向醒。佢早排因為林鄭參選特首，所以幾十年來第一次走去訂做套西裝，而老公為咗增加套西裝嘅效益，梗係要着多幾次唔好浪費，所以佢當晚就揀咗呢套飲衫，陪太座出席慈善晚宴。