瑞聲（2018）連續幾日徘徊喺90蚊邊後，周四下午再俾Batman狙擊，葛咸城研究再發報告唱衰瑞聲。今次份報告長達43頁，仲要標題大大隻字寫住Part 1，變相話畀大家聽，Part 2隨時放送，大玩擠牙膏式放料。就算瑞聲復牌澄清，Batman狙擊陰霾都仲會纏繞住佢，所以暫時都係不宜沾手。
至於騰訊（700）今日創新高，喺科網股小股災下仍企得穩，但唔好忘記隻股明日除淨，外圍科網股走勢轉弱，所以都係小心為上。
是日推介聯合光伏（686），先講背景，聯合光伏第一大股東係招商新能源，有央企撐腰。今年最Hot國策概念之一當然係「一帶一路」，聯合光伏亦早就積極部署。好似今年初，就委任前國家能源局國際司司長鄒逸橋，為「一帶一路」總顧問及戰略委員會主席，話要將集團打造成為「一帶一路」新能源代表企業。
上年9月與聯合國開發計劃署（UNDP）訂立諒解備忘錄，以建造熊貓太陽能發電站。即係咁，能夠同聯合國合作，亦代表聯合光伏有一定地位，絕對有資格參與「一帶一路」個Party。
近日股價先旗形突破，再衝上15年中以來高位，走勢省鏡，可以話係招商系內走勢最突出嘅一隻，可落注跟進。
Fifi
http://fb.com/lovefrystock
本欄逢周五刊出