鷹君（041）羅氏一家上演「溏心風暴」，呢兩星期派足花生，但一早已經自立門戶嘅四子羅康瑞似乎就冇乜興趣，一於懶理家事，都係上京推銷一帶一路要緊。話說上星期日母親節（5月14日），一班羅氏兄弟姊妹爭住同羅老太慶祝，唯獨唔見羅康瑞身影，原來係跟咗金管局總裁陳德霖上京，出席一帶一路國際合作高峯論壇。羅康瑞身為貿易發展局主席，一帶一路呢類大政策當然要撐場。會上星光熠熠，羅康瑞仲同陳德霖、財庫局局長陳家強、港鐵（066）主席馬時亨selfie留念，睇相似乎仲係陳局長負責揸機。