禮拜日（21日）為沙田八草兩泥賽事，草地用最狹窄之C加3欄，預計場地掛牌為好地。
睇番最近3月12日同一移欄亦係跑好地，當日除了「罕曾見」後上贏馬外，其餘頭馬全部守前四位入直路建功，其中「獅子驄」、「育成寶貝」及「美麗寶寶」更加一放到底，可見跑道狹窄對前置馬較為有利。
今戰列陣馬中，出戰頭場四班1200米「旅英駿爵」（霍利時馬房）上仗正是於田C加3欄1200米憑快放勝出，贏完等番同一移欄再跑，兼用最強十磅仔之潘明輝，睇部署有心想添食；另外，角逐第四場四班1800米的「實業風采」（葉楚航馬房）三戰田C加3欄獲一勝兩位，再配另一位十磅仔巫顯東出戰，憑較佳場地性能可重響勝鼓。
至於兩場泥地路程均為1200米，最近4月23日三場同程之放頭馬「盈喜悅」、「兄弟熊」及「花月流星」全部非勝即位，第二場的「有福氣」及第七場「老友記」等擅跑泥地之快放馬可優先留意。