男人都可以貪靚，要講貪靚金融人，康宏（1019）主席王利民與恒明珠證券行政總裁呂錦傑（Jammy）一定有份，兩人身上西裝肯定襯過晒，王利民偏好搶眼配搭，Jammy稍為正經保守，但唔抗拒花款顏色。
咪以為兩人天生識着衫，佢哋曾經着錯晒。王利民初出茅廬時喜歡着孖襟西裝，「可能當年睇得《教父》多，以為着孖襟好型，唔知道個身要夠厚先着得好睇」。佢形容自己當年着到九唔搭八。
深色單襟顯瘦
Jammy就錯在太信名牌，佢話：「初出來工作買晒歐洲名牌着上身，有時一套花過萬，其實衣不稱身。」家陣佢只度身訂做西裝，平均一套幾千銀。
講到配襯心得，王利民一句到尾：「着衫最重要係身嘅問題，唔係衫嘅問題。」佢同Jammy一樣注重身形，王利民出名愛跑山、跑馬拉松，Jammy就熱愛健身，二人穿起各款西裝都fit身，冇肚腩浮現。
但好多香港男士都有肚腩，差在大腩還是小腩，LUXE Tuxedo時裝設計師Kurt就教路，男士有肚腩，一定要揀深色單襟西裝，最好度身訂做，咪戴腰帶，以免凸出腰線。
講到底，男女都一樣，想靚係需要付出嘅。
李華華
mailto:[email protected]