股王騰訊2017年首季業績勁省鏡，強勢到連「侵侵」出事都唔驚，港股跌百幾點都依然照破頂，噚日科網爆小股災，股價都只係升少咗。從業績嚟睇，騰訊仲未到全盛時期，大膽咁講，買騰訊未來幾年都冇得輸！
微信和WeChat合併月活躍賬戶數已超過9.38億，按年升23%，意味住內地每十個人之中就有七個有用微信。呢個龐大嘅用戶群可以為騰訊其他業績帶來協同效應，包括支付、遊戲、影視及廣告業務等。微信支付點解可以成功滲透全國各行業？其中一大原因係，微信支付有微信一個大靠山，大多微信用戶都有會用微信支付，微信活躍用戶增長，將會為支付業務帶來巨大嘅協同效應。可以想像，如果What's app搞埋電子支付業務，我諗我都會用。
睇返騰訊業績，首季按年多賺58%至144.76億元（人民幣‧下同），收入增長55%至接近500億元，勝市場預期。遊戲依然是騰訊的收入增長動力，網絡遊戲收入增長34%至228.11億元，其中智能手機遊戲收入為129億元，增長57%，智能手機遊戲（如《王者榮耀》及《龍之穀》）及PC遊戲（如《英雄聯盟》及《地下城與勇士》）成大功臣。
講到騰訊遊戲，不得不提呢隻喺大陸爆紅嘅《王者榮耀》，不過佢只係起步階段。騰訊2011年成為全球高人氣遊戲《英雄聯盟》（LOL）發行商Riot Games的大股東後，希望將LOL嘅成功複製到手機，2015年尾推出手遊《王者榮耀》，兩者玩法大同小異，意味住佢已贏在起跑線，所以上架唔夠兩年，日活躍用戶已超過5,000萬。內地智能手機用戶冇十億都有八億，用戶增長潛力大，未來盈利能力不容小覷。
風吹知
本欄逢周五刊出