梁振英嘅UGL事件，本欲大事化小，小事化無，在立法會建制派議員力保下，本應可以壓下去，令立法會調查無疾而終。唔知點解，建制派保皇不力，竟讓泛民成立調查委員會之議，得以通過，怪事也。成立UGL調查委員會之後，建制派議員就實行「傷害控制」（damage control），將委員會開會變成閉門會議，唔俾公眾知咁多，直情係豈有此理。
點知歐洲足球圈有一句笑話：「不怕對手強，只怕有豬一般的隊友」，呢呢，簡直笑死人，民建聯議員周浩鼎律師，畢業於英國頂尖名校LSE，又在香港大學讀PCLL，應屬叻仔一名，竟然弄出大笑話，成為建制派「豬一般的隊友」，相信梁振英都頂唔順呢位鼎少，其他建制派更加氣頂，猛咁講：「頂……！」乜唔係啫，梁振英與周浩鼎電郵曝光之日，左丁山剛好與一位建制派吃午飯，未夠兩點佢就鬆人話去開會，聽梁特講一帶一路與大灣區，臨走前左丁山特登問佢鼎少之事，佢就衝口而出：「頂，咁低級嘅錯誤！佢識唔識嘢㗎！」
建制派唔知係唔係「延攬人才」有困難，新一代人物往往唔多夠班，弄出笑話。周律師擺烏龍將電郵遞交立法會秘書處還算事小，佢在調查委員會開會前與受調查人物交流意見（或者直情係聽指示）就事大，堂堂一位立法會議員竟然向受調查人物通水，識得知羞就要辭職啦。美國總統特朗普見前FBI局長，問及「我是不是受調查」，已受美國民主黨議員大力抨擊，想唔到我們的特首明知自己已受調查，竟然與調查委員會成員一起修訂文件，比特朗普更進一步！
坦白講，在目前政治情況下，梁振英最叻轉移視線，立即對記者指控有人披露不應公開的文件，應受調查，被調查之人指調查委員應受調查，一於搞到大家頭暈眼花，眨下眼就到六月底，佢已經離任咯，到時有林鄭護航，整件事又會不了了之，梁特任全國政協副主席，心安理得！而周律師做議員兼民建聯副主席，繼續扮演年青一代政治菁英，香港人能拿他們怎麼樣？鼎鼎鼎！建制派年青一代叻仔如此，老一輩梁愛詩律師就話如無一地兩檢，西九高鐵總站不如炸咗佢，語出驚人，詩姑駛唔駛咁勞氣呀，當初起高鐵，係特區政府堅持嘅，唔係全部香港人支持興建嘅，不少市民今日講起，仲係頂住度氣呀！老建制出言傲慢，37歲新科議員辦事糊塗透頂，唔怪得中央還是要重用港英餘黨治港。