立法會近日因為豬鼎鼎事件，泛民建制氣氛緊張之餘，唔少傳媒聽到689謬論連連，亦難免心浮氣躁，一班專業議政立法會議員，噚日就化身「生果佬」，每人各抬一盒生果，到立法會走廊派畀記者，希望可以幫記者下下火。
發起今次「降火」行動的社福界議員邵家臻話，近日經過立法會走廊時，見到記者因為採訪豬鼎鼎事件勁辛苦，加上預算案辯論又悶，所以就想買啲生果幫記者打氣同潤喉。
結果阿臻建議一呼百應，7名專業議政議員一致贊成，噚日就立即喺油麻地果欄訂咗幾十個日本蘋果同韓國雪梨後，再由議員抬到立法會走廊送畀記者食，結果唔使一陣就派晒。
由於專業議政多立法會議員，所以阿臻話每人唔使夾200元就搞掂，係相當化算喎。