聽講中環人着西裝返工越來越兩極，低級穿得四正，中高層反而越來越smart causal。其實着西裝唔使分高中低層，男士着得型返工，理所當然，而且唔使日日黑藍灰，花些少心思配搭，那怕只係加條白色袋巾，已經可以型住返工見客。
Luxe Tuxedo時裝設計師Kurt指出，男士30歲左右，應該開始透過西裝着出男人味，去到40、50歲，如果依然着得fit身，證明他們保養得宜，注重外表。需知道男士注重外表不是罪，反而令人覺得佢哋兼顧到事業同生活，先至再有時間貪靚。
佢認為，男士最基本要有兩至三套西裝旁身，一套深色、一套有pattern（如格仔或條子）、一套淨淺色。
但香港男士始終偏向保守，「成日想着得特別，但又唔想太勁」咁矛盾，唯有喺細節上着手。
佢指出，領帶以外，近年香港男士開始接受配襯袋巾，袋巾等於女士的配飾，售價介乎100元至過千元，有淨色或花紋圖案，基本上，有3條旁身已經好易配搭，當中又以白色最百搭。
為作示範，Kurt配搭咗幾套西裝，周一大家剛剛放完假，為表達已經收拾心情上班，全套藍色，sharp醒又穩重；跟住幾日可以考慮襯套灰色格仔，中間有紫色條紋，放工去clubbing都好型；碎點西裝襯深色褲，smart causal掂晒。
